Aanniaqtuliqiyit Inuliqiyillu-kut (H&SS) Havakviat

Ikluqpautivut utuqqaqpalliaplutik, tajja himiuyut avatiinit ukkutjat igalaallu huruqpalliayut ahiruqpalliaplutik hilamit, taimaa itiralattiplugu hilamit anurimik ikluqpangnut, uqquuyuqlu anuri anialattiplugu hilamut. Taimaa qulliqtuqpallaarnaqtuq iharianaqtumik uunnaqhimayaamik ikluaqqut, ingattauyuq ukiumi qaayurnaqtumi. Ahiqquiyaqhugit himiutait hunaqutillu avatiinit ukkutjat igalaallu ikighilaarutauvaktuq uunaqutituqpallaaqnaittumik, taimaalu uqquuhimayaamik aulahimaittumik.

Imaq annirnatqiyauyuq pivighaqqut. Inuit tamangnik imarmik atuqpallaaqtaililaaqtut upluq tamaat, kihimi ihuatqiyanik-qulliqtuqpallaaqnaittunik imautiqarumik ihuaqutauvaktuqlu. Kavamatkut ikluqpautait inmikkut ihuaqhainahualiqtut ikighilaarahuaqhugu imaqtuqtait taimaalu imaqtuqpallaaqtailiplutik ayuqnaitpat. Taimaa himmiqtuiplugit tajja atuqtauyut, ihuilutauyut imautinut tuqhutjat nutaanik, qulliqtuqpallaanngittunik “mighut qurluqtunik” imautinik aajjikkutaanik, nakuutqiyaanikluuniit, imautim hakugingnianik imaqtuqpallaaqhimaittumik.

Qulliit qulliqtuqpaktut taimaa 20%-mit 50%-mut ikluqpautim qulliqtuutainik, talvuuna qiniqhiaplutik qulliqtuqpallaaqnaittunik taimaa ikluqpauyuq qulliqtuqpallaaqtailiyaamik. Qulliqnik aallannguqtiriyut aularaaqnaqtunik, qulliqtuqpallaaqtailiplutik quanaqtut taapkua uplumirnitat LED-nguyut qulliit ayuittuniklu munaqhitiqariamik ikluqpangnik. Nutaannguqtiqtaqqut qulliit munaqhitiillu tamatkinnuaqhugit Kavamatkut ikluqpautait, taimaa iniqhinahuaqhuta: • Qulliqtuqpallaaqtailiplugit, talvuuna akighilaaqpaktut qulliqnut akiliqtaghat ikighilaaqhugillu Uqquuhivalliayumi Kaassiliit tipainik ilauyut alruyaqtuqniqmut nunallaarnit uqhuqyuaqtuqtunit qulliliqivingnit; • Atuqtaulluaqtunik qulliqnik iliurailutik ayuqnaiyariamik ahiqquiyaiyut havaaghait taimaalu ihuaqtunik qulliqariamik tamangnik ikluarnit; • Ihuaqhivaalliqlugit qulliqtuutit munautaillu, inuqariaghaanik qauhitiqarlutik taaqhitaqtuniklu nanikiaq ikluarnit taimaa qulliqtuqpallaaqtailiplutik qulliillu ihuaqhivaalliqlugit.

Ingilrutit havauhiit uunaqutinut, qingarnullu, imautiniklu uunaqutinut ingilratjuhiit nakuruttiqtauvaktut nutaannguqtirigaangamik nutaanut, qulliqtuqpallaaqnaittunik aajjikkutavyangnik atuqtauhuiqvia tikittiiplugu. Nutaannguqtiriyaqqut utuqqat, ihuaqutaunngittut anurihiutit, pakpautit, uunaqutit, ahiniklu aajjikkutavyainik ingilrutinik Kavamatkut ikluqpautainit ihuaqhivalliayaamik ikayuutait. Amihuiqtuqhutik, hapkunuuna nutaannguqtiqtakkut ikluqpautivut ikiniqhakkut aulapkaiyaamik qulliqtuqpallaaqtailiplutik aulapkaiplugit, ihuaqhaiplugilluuniit, iluaniittut avatinut qanurininganiit. Uqauhikkut ahiagut, pinahuaqhimayugut aajjikkutanik, angitqiyaanikluuniit, ikluqpautivut ingilrutighainik, kihimi qulliqtuqpallaaqtailipluta!