Anngutighaliqiyit Havakviat

Nutaannguqtiriyut Ikluqpautinit Atauttikkuuqtunik Havauhirnik (BAS) atauhiuyuq ilitturinnaqpiaqtuq havauhiq Atuttiarniq ikayuutainit. Nutaannguyut nutaannguqtiqhimayullu BAS-nguyut nakuutqiyamik munaqhiyaamik ikluqpautim uunaqutainik, qingautainik, qulliutainik, ahiniklu qulliqtuqpallaanngittut ingilrutit, kihimi tamangnik ingilrutit ungahiaqtumit munaqtauvangniat ayuqnaittumik paqittiyaamik ihuilutinik kayumiktumiklu, ihuaqtukkut kiuhiyaamik aallannguqtunut ikluqpautinit. Nutaatqiyanik, atuqtaulluaqtunik havauhiqariamik Ikluqpautinik Atauttikkuuqtittiniqmut ihuaqutauvaktut atuttiariamik ikluqpautit ingilrutainik qulliqtuqpallaaqtailiplutik munaqhitit havauhiigut, niklamaniit iniriiqhugit, nutaaniklu HVAC-nut ingilrutainut ingilravighanik. Hapkua havauhiit ilitturinnaqtut aulapkaiyinut ihuaqhutiklu ahiqquiyainiqmut – ihuaqhainiqmullu – ikluat qanurininganiit ikluqpautinit, talvuuna qulliqtuqpallaaqtailiplutik akighilaaqhugillu akiliqtaghat qamitpaghugit ingilrutit ihariagiyaunngitpata.

Qulliit qulliqtuqpaktut taimaa 20%-mit 50%-mut ikluqpautim qulliqtuutainik, talvuuna qiniqhiaplutik qulliqtuqpallaaqnaittunik taimaa ikluqpauyuq qulliqtuqpallaaqtailiyaamik. Qulliqnik aallannguqtiriyut aularaaqnaqtunik, qulliqtuqpallaaqtailiplutik quanaqtut taapkua uplumirnitat LED-nguyut qulliit ayuittuniklu munaqhitiqariamik ikluqpangnik. Nutaannguqtiqtaqqut qulliit munaqhitiillu tamatkinnuaqhugit Kavamatkut ikluqpautait, taimaa iniqhinahuaqhuta: • Qulliqtuqpallaaqtailiplugit, talvuuna akighilaaqpaktut qulliqnut akiliqtaghat ikighilaaqhugillu Uqquuhivalliayumi Kaassiliit tipainik ilauyut alruyaqtuqniqmut nunallaarnit uqhuqyuaqtuqtunit qulliliqivingnit; • Atuqtaulluaqtunik qulliqnik iliurailutik ayuqnaiyariamik ahiqquiyaiyut havaaghait taimaalu ihuaqtunik qulliqariamik tamangnik ikluarnit; • Ihuaqhivaalliqlugit qulliqtuutit munautaillu, inuqariaghaanik qauhitiqarlutik taaqhitaqtuniklu nanikiaq ikluarnit taimaa qulliqtuqpallaaqtailiplutik qulliillu ihuaqhivaalliqlugit.

Ingilrutit havauhiit uunaqutinut, qingarnullu, imautiniklu uunaqutinut ingilratjuhiit nakuruttiqtauvaktut nutaannguqtirigaangamik nutaanut, qulliqtuqpallaaqnaittunik aajjikkutavyangnik atuqtauhuiqvia tikittiiplugu. Nutaannguqtiriyaqqut utuqqat, ihuaqutaunngittut anurihiutit, pakpautit, uunaqutit, ahiniklu aajjikkutavyainik ingilrutinik Kavamatkut ikluqpautainit ihuaqhivalliayaamik ikayuutait. Amihuiqtuqhutik, hapkunuuna nutaannguqtiqtakkut ikluqpautivut ikiniqhakkut aulapkaiyaamik qulliqtuqpallaaqtailiplutik aulapkaiplugit, ihuaqhaiplugilluuniit, iluaniittut avatinut qanurininganiit. Uqauhikkut ahiagut, pinahuaqhimayugut aajjikkutanik, angitqiyaanikluuniit, ikluqpautivut ingilrutighainik, kihimi qulliqtuqpallaaqtailipluta!