ᓇᓄᒃ ᐃᓕᓐᓂᐊᕐᕕᒃ

ᐅᓪᓗᒥᒨᖓᓕᖅᑎᑕᐅᓂᖏᑦ ᐃᓪᓗᓄᑦ ᐃᑭᑦᑕᐅᑎᒋᔭᖅᑐᓄᑦ ᖃᒥᑦᑕᐅᒋᔭᖅᑐᓄᑦ ᐊᑐᖅᑕᐅᔪᑦ ᐊᐅᓚᑕᐅᓂᖏᑦ (BAS) ᐃᓚᒋᔭᖓ ᐱᓚᒋᓪᓗᐊᑕᖅᑕᖏᑦ ᐅᑯᓇᓂ ᐊᑐᑦᑎᐊᕐᓂᖅ ᐱᓕᕆᐊᖅ. ᓄᑖᖑᑐᐃᓐᓇᕐᓂᖓᓅᖏᑦᑐᖅ ᐊᒻᒪ ᐱᐅᓯᑎᒋᐊᖅᑕᐅᓂᖓᓄ ᐃᓪᓗᓄᑦ ᐃᑭᑦᑕᐅᑎᒋᔭᖅᑐᓄᑦ ᖃᒥᑦᑕᐅᒋᔭᖅᑐᓄᑦ ᐊᑐᖅᑕᐅᔪᑦ ᐊᐅᓚᑕᐅᓂᖏᑦ ᐱᔪᓐᓇᑎᑦᑎᓂᐊᖅᑐᑦ ᐊᐅᓚᑦᑎᑎᐊᕐᓂᖅᓴᐅᓗᑎ ᐃᓪᓗᒧᑦ ᐅᖅᑰᓴᕐᓂᖓ, ᐊᓂᕐᓂᖃᓇᕐᓂᖓ, ᖃᐅᒪᖃᕐᓂᖓ, ᐊᒻᒪ ᐊᓯᖏᑦ ᐆᒻᒪᖅᑯᑎᑐᖅᑐᑦ ᐊᑐᖅᑕᐅᔪᑦ, ᑭᓯᐊᓂ ᐊᑐᓂ ᐊᑐᖅᑕᐅᔪᑦ ᐅᖓᓯᑦᑐᒥᑦ ᐱᔭᔅᓴᐅᓂᐊᖅᑐᑦ ᓴᓇᒋᐊᖅᑕᐅᓴᖃᐃᓐᓂᖓᓄᑦ ᐱᒡᒐᓇᖏᑦᑐᒥᓪᓗ ᐊᒻᒪ ᓱᑲᑦᑐᒥᑦ, ᖃᓄᐃᓕᓯᒋᐊᕐᓂᖃᑦᑎᐊᕐᓗᓂ ᐊᓯᔾᔨᖅᑐᓄᑦ ᐃᓪᓗᒥᑦ. ᐱᖃᖅᑐᓂ ᐅᓪᓗᒥᒨᖓᔪᓂᑦ, ᐊᑐᖅᑕᐅᒐᔪᓐᓂᐅᔪᖅ ᐃᓪᓗᓄᑦ ᐃᑭᑦᑲᑕᐅᑎᒋᔭᖅᑐᓄᑦ ᖃᒥᑦᑕᐅᑎᒋᔭᖅᑐᓄᑦ ᐱᔪᓐᓇᑎᑦᑎᔪᖅ ᐊᕋᔅᓴᐅᔪᓂᑦ ᐊᑐᖅᑕᐅᑎᐊᕐᓂᖏᓐᓄᑦ ᐆᒻᒪᖅᑯᑎᓂᑦ ᐱᐅᖅᓱᐊᓂᒃᑯᑦ ᐸᕐᓇᐅᑎᓂᑦ ᐊᑦᑐᐊᓂᓖᑦ ᐊᐅᓚᑕᐅᓂᖏᓐᓄᑦ ᐊᑐᖅᑕᐅᓂᐊᖅᑐᑦ, ᐆᓇᕐᓂᖏᑦ ᐋᖅᑭᑦᑕᐅᔪᑦ, ᐊᒻᒪ ᓄᑖᑦ ᐆᓇᕐᓂᖃᕐᕕᒃ ᐊᒻᒪ ᐊᓂᕐᓂᖃᕐᕕᒃ ᐊᑐᖅᑕᐅᒐᔪᖃᑦᑕᖅᓂᖏᑦ. ᑖᒃᑯᐊ ᐸᕐᓇᐅᑏᑦ ᑕᑯᔅᓴᐅᑎᐊᖅᑐᑦ ᐊᐅᓚᑦᑎᔨᓄᑦ ᐊᑐᕐᓂᖃᑦᑎᐊᖅᑐᑎᑦ ᒪᑭᒪᑎᑦᑎᓂᕐᒧᑦ − ᐅᕝᕙᓘᓐᓃᑦ ᐱᐅᓯᑎᑦᑎᒋᐊᓂᕐᒥᑦ − ᐃᓂᖏᓐᓂ ᖃᓄᐃᓐᓂᖏᓐᓂᑦ ᐃᓗᐃᑦ ᐃᓗᐃᓂ, ᐱᐅᖅᓱᐊᓯᓐᓈᖅᑐᑎᑦ ᐆᒻᒪᖅᑯᑎᓂᑦ ᐊᒻᒪ ᐊᐅᓚᓂᖏᓐᓄᑦ ᐊᑭᖏᓐᓂᑦ ᖃᒥᑦᑕᐅᓪᓗᑎᑦ ᓱᓇᒃᑯᑖᑦ ᐊᑐᖅᑕᐅᔭᕆᐊᖃᖅᑎᓐᓇᒋᑦ ᐊᑐᖅᑕᐅᒋᐊᓖᑦ.

ᐃᓪᓗᕗᑦ ᐱᑐᖃᕈᖅᐸᓪᓕᐊᑎᓪᓗᒋᑦ, ᒫᓐᓇᐅᔪᒥᑦ ᓯᒥᔅᓯᒪᔪᑦ ᑭᓪᓕᖏᓐᓂ ᒪᑐᐃᑦ ᐊᒻᒪ ᐃᒐᓛᑦ ᓄᖑᑎᖁᓐᓇᖅᑐᑦ ᐊᒻᒪ ᓱᕋᓪᓗᑎᑦ ᓯᓚᒧᑦ, ᐃᓗᐊᓃᕆᒃᑲᓂᖅᑐᓂᑦ ᐃᒻᓚᒦᖔᖅᑐᓂ ᐃᓪᓗᓄᑦ, ᐊᒻᒪ ᐆᓇᕐᓂᖓ ᔭᒐᑕᐅᓂᐊᖅᑐᓂ ᓯᓚᒦᖔᖅᑐᒥᑦ. ᑖᓐᓇ ᖁᕝᕙᕆᐊᖅᑎᑦᑎᔪᖅ ᐆᒻᒪᖅᑯᑎᓄᑦ ᐱᔭᐅᔭᕆᐊᓖᑦ ᓈᒻᒪᑦᑐᒥᑦ ᐆᓇᖅᓯᑎᓪᓗᒋᑦ ᐃᓂᒋᔭᕗᑦ, ᐱᓗᐊᖅᑐᒥᑦ ᓂᓪᓕᓇᖅᑎᓪᓗᒍ ᐅᑭᐅᒃᑯᑦ ᑕᑦᑭᖏᓐᓂ. ᓴᓇᔭᐅᓂᖏᑦ ᓯᒥᑦᑐᖅᓯᒪᔪᑦ ᐊᒻᒪ ᐋᖅᑭᔅᓯᒪᔪᑦ ᑭᓪᓕᖏᓐᓂ ᒪᑐᐃᑦ ᐊᒻᒪ ᐃᒐᓛᑦ ᐃᑲᔪᖅᑐᑦ ᐊᑦᑎᓪᓕᒋᐊᖅᑐᒋᑦ ᐅᖅᑰᓴᓂᕐᒧᑦ ᐱᑕᖃᕆᐊᖃᖅᑎᑕᐅᔪᑦ ᐊᒻᒪ ᐆᒻᒪᖅᑯᑎᓂᑦ ᐊᑐᕐᓂᖓ, ᐊᒻᒪ ᐃᑲᔪᖅᑐᓂ ᐃᓪᓘᑉ ᐃᓗᐊᓂ ᐆᓇᕐᓂᖓ ᐃᓗᐊᓃᖏᓐᓇᖅᑐᓂ ᐊᔾᔨᒌᓕᓐᓂᑦ.

ᐃᒥᖅ ᐱᒻᒪᕆᐅᓛᖑᑎᑕᕗᑦ ᓄᓇᒦᖔᖅᑐᖅ. ᑭᒃᑯᑐᐃᓐᓇᐃᑦ ᐊᑐᕈᓐᓇᖅᑐᑦ ᐊᐅᓚᓂᖃᑦᑎᐊᖅᑐᒥᑦ ᐃᒥᖅᑐᖃᑦᑕᓂᕐᒥᑦ ᖃᐅᑕᒫᑦ ᐃᓅᓯᕐᓂᑦ, ᑭᓯᐊᓂ ᐊᐅᓚᓂᖃᑦᑎᐊᖅᑐᓂᑦ ᐃᒥᕐᓄᑦ ᑯᕕᕕᖏᑦ ᐊᒻᒪ ᐃᓪᓗᒨᖓᔪᑦ ᐊᖏᔪᒥᑦ, ᐃᑲᔪᕐᓂᖃᒻᒪᕆᑦᑐᑦᑕᐅᖅ. ᒐᕙᒪᒃᑯᑦ ᐃᓪᓗᖏᑦ ᐃᓚᒋᔭᐅᖃᑕᐅᔪᑦ ᐊᑦᑎᓪᓕᒋᐊᖅᑎᑎᓪᓗᑎ ᐱᔭᐅᔪᒪᔪᓂᑦ ᐃᒥᕐᓂᑦ ᐊᒻᒪ ᖁᕝᕙᕆᐊᖅᑕᐅᓗᓂ ᐃᒥᕐᓂᑦ ᐊᑐᑦᑎᐊᓂᕐᒧᑦ ᖃᖓᑐᐃᓐᓇᒃᑯᑦ ᑕᐃᒪᐃᒍᓐᓇᑎᓪᓗᒍ. ᑖᓐᓇ ᐱᖃᓯᐅᔾᔨᔪᖅ ᐊᓯᔾᔨᖅᑕᐅᓂᖏᑦ ᐊᒥᓲᓂᖅᓴᐃᑦ ᒫᓐᓇᐅᔪᒥᑦ, ᐊᐅᓚᓂᖃᑦᑎᐊᖏᑦᑐᑦ ᐃᒥᕐᓄᑦ ᓱᓪᓗᓖᑦ ᓄᑖᓄᑦ, ᖁᕝᕙᓯᑦᑐᒥᑦ ᐊᐅᓚᓂᖃᑦᑎᐊᖅᑐᑦ “ᐊᑦᑎᑦᑐᒥᑦ ᐃᖏᕋᓂᓕ” ᑯᕕᕕᖏᑦ ᐱᑕᖃᖅᑎᑦᑎᔪᑦ ᐊᔾᔨᒌᓂᑦ, ᐅᕝᕙᓘᓐᓃᑦ ᐱᐅᓂᖅᓴᓂᑦ, ᐃᒥᕐᒧᑦ ᐳᓪᓚᖃᕐᓂᖓᓄᑦ ᖃᓄᐃᓘᖃᑦᑕᕐᓂᖓᓄᑦ ᐃᒥᖅᑐᖏᓐᓂᓴᐅᓪᓗᑎ.

ᐊᐅᓚᐅᑎᓅᖓᔪᑦ ᐊᑐᖅᑕᐅᔪᑦ ᐃᓪᓗᒨᑦ ᐆᓇᕐᓂᖃᖅᑎᑦᑎᔪᑦ, ᐊᒻᒪ ᐊᓂᕐᓂᖃᖅᑎᑦᑎᔪᑦ, ᐊᒻᒪ ᐃᒥᕐᒧᑦ ᐆᓇᖅᑐᓕᐅᕈᑏᑦᐊᐅᓚᓂᖏᑦ ᐃᑲᔪᐃᓂᖃᖅᑐᑦ ᐱᐅᓯᑎᒋᐊᕈᑎᓂᑦ, ᐆᒻᒪᖅᑯᑎᓂᑦ ᐊᑐᑦᑎᐊᓂᖅᓴᐃᑦ ᐊᔾᔨᐸᓗᖏᑦ ᐊᑯᓂᐅᓂᕆᓂᐊᖅᓯᒪᔭᖏᓐᓄᑦ ᐊᑐᕈᓐᓇᖅᑕᐅᓂᖏᓐᓄᑦ ᐊᑯᓂᐅᓂᖃᖅᑐᑎᑦ. ᑖᒃᑯᐊ ᐱᓕᕆᐊᕆᔭᕗᑦ ᐱᐅᓯᑎᒋᐊᕈᑏᑦ ᐱᑐᖃᕐᓄᑦ, ᐊᐅᓚᓂᖃᑲᒻᒪᑦᑐᑦ ᐊᓄᕌᕈᑏᑦ, ᒥᓪᓗᐊᕈᑏᑦ, ᐆᓇᖅᓯᑦᑏᑦ, ᐊᒻᒪ ᐊᓯᖏᑦ ᑲᑉᐳᑎᒋᐊᖃᒐᔪᑦᑐᑦ ᒐᕙᒪᒃᑯᑦ ᐃᓪᓗᖏᓐᓂᑦ ᐱᐅᓯᑎᒋᐊᕆᐊᖃᖅᑐᑦ ᐱᔨᑦᑎᖅᑕᖏᑦ. ᐊᒥᓲᓂᖅᓴᐅᔪᓂᑦ, ᑖᒃᑯᐊ ᐱᐅᓯᑎᒋᐊᕈᑏᑦ ᐃᓪᓗᑎᓐᓂᑦ ᑎᑭᑦᑎᒍᓐᓇᑎᑦᑎᔪᑦ ᐊᑦᑎᓛᖓᓂ ᐊᐅᓚᓂᖏᓐᓄᑦ ᖃᓄᐃᓕᕆᔭᖏᓐᓂᑦ ᐆᒻᒪᖅᑯᑎᓄᑦ ᐱᔭᐅᔪᒪᔪᓄᑦ ᒪᑭᒪᑎᑦᑎᓪᓗᑎ, ᐅᕝᕙᓘᓐᓃᑦ ᐱᐳᓯᑎᒋᐊᖅᑎᑦᑎᓗᑎ, ᐃᓪᓘᑉ ᐃᓗᐊᓂ ᐊᕙᖏᑦ ᖃᓄᐃᓐᓂᕆᔭᖏᓐᓂᑦ. ᐊᓯᐊᒍᑦ ᐅᖃᕐᓗᒍ, ᐱᓇᓱᐊᖅᑐᒍᑦ ᐊᔾᔨᖓᓂᑦ, ᐅᕝᕙᓘᓐᓃᑦ ᐊᖏᓂᖅᓴᒥᑦ, ᐃᓪᓗᓂᑦ ᐊᐅᓚᑕᐅᑎᓅᖓᔪᑦ ᐊᑐᖅᑕᐅᔪᓂᑦ, ᑭᓯᐊᓂ ᐆᒻᒪᖅᑯᑎᑐᖏᓐᓂᖅᓴᐃᑦ!