ᕿᑭᖅᑖᓗᖕᒥ ᐋᓐᓂᐊᕐᕕᒃ

ᐅᓪᓗᒥᒨᖓᓕᖅᑎᑕᐅᓂᖏᑦ ᐃᓪᓗᓄᑦ ᐃᑭᑦᑕᐅᑎᒋᔭᖅᑐᓄᑦ ᖃᒥᑦᑕᐅᒋᔭᖅᑐᓄᑦ ᐊᑐᖅᑕᐅᔪᑦ ᐊᐅᓚᑕᐅᓂᖏᑦ (BAS) ᐃᓚᒋᔭᖓ ᐱᓚᒋᓪᓗᐊᑕᖅᑕᖏᑦ ᐅᑯᓇᓂ ᐊᑐᑦᑎᐊᕐᓂᖅ ᐱᓕᕆᐊᖅ. ᓄᑖᖑᑐᐃᓐᓇᕐᓂᖓᓅᖏᑦᑐᖅ ᐊᒻᒪ ᐱᐅᓯᑎᒋᐊᖅᑕᐅᓂᖓᓄ ᐃᓪᓗᓄᑦ ᐃᑭᑦᑕᐅᑎᒋᔭᖅᑐᓄᑦ ᖃᒥᑦᑕᐅᒋᔭᖅᑐᓄᑦ ᐊᑐᖅᑕᐅᔪᑦ ᐊᐅᓚᑕᐅᓂᖏᑦ ᐱᔪᓐᓇᑎᑦᑎᓂᐊᖅᑐᑦ ᐊᐅᓚᑦᑎᑎᐊᕐᓂᖅᓴᐅᓗᑎ ᐃᓪᓗᒧᑦ ᐅᖅᑰᓴᕐᓂᖓ, ᐊᓂᕐᓂᖃᓇᕐᓂᖓ, ᖃᐅᒪᖃᕐᓂᖓ, ᐊᒻᒪ ᐊᓯᖏᑦ ᐆᒻᒪᖅᑯᑎᑐᖅᑐᑦ ᐊᑐᖅᑕᐅᔪᑦ, ᑭᓯᐊᓂ ᐊᑐᓂ ᐊᑐᖅᑕᐅᔪᑦ ᐅᖓᓯᑦᑐᒥᑦ ᐱᔭᔅᓴᐅᓂᐊᖅᑐᑦ ᓴᓇᒋᐊᖅᑕᐅᓴᖃᐃᓐᓂᖓᓄᑦ ᐱᒡᒐᓇᖏᑦᑐᒥᓪᓗ ᐊᒻᒪ ᓱᑲᑦᑐᒥᑦ, ᖃᓄᐃᓕᓯᒋᐊᕐᓂᖃᑦᑎᐊᕐᓗᓂ ᐊᓯᔾᔨᖅᑐᓄᑦ ᐃᓪᓗᒥᑦ. ᐱᖃᖅᑐᓂ ᐅᓪᓗᒥᒨᖓᔪᓂᑦ, ᐊᑐᖅᑕᐅᒐᔪᓐᓂᐅᔪᖅ ᐃᓪᓗᓄᑦ ᐃᑭᑦᑲᑕᐅᑎᒋᔭᖅᑐᓄᑦ ᖃᒥᑦᑕᐅᑎᒋᔭᖅᑐᓄᑦ ᐱᔪᓐᓇᑎᑦᑎᔪᖅ ᐊᕋᔅᓴᐅᔪᓂᑦ ᐊᑐᖅᑕᐅᑎᐊᕐᓂᖏᓐᓄᑦ ᐆᒻᒪᖅᑯᑎᓂᑦ ᐱᐅᖅᓱᐊᓂᒃᑯᑦ ᐸᕐᓇᐅᑎᓂᑦ ᐊᑦᑐᐊᓂᓖᑦ ᐊᐅᓚᑕᐅᓂᖏᓐᓄᑦ ᐊᑐᖅᑕᐅᓂᐊᖅᑐᑦ, ᐆᓇᕐᓂᖏᑦ ᐋᖅᑭᑦᑕᐅᔪᑦ, ᐊᒻᒪ ᓄᑖᑦ ᐆᓇᕐᓂᖃᕐᕕᒃ ᐊᒻᒪ ᐊᓂᕐᓂᖃᕐᕕᒃ ᐊᑐᖅᑕᐅᒐᔪᖃᑦᑕᖅᓂᖏᑦ. ᑖᒃᑯᐊ ᐸᕐᓇᐅᑏᑦ ᑕᑯᔅᓴᐅᑎᐊᖅᑐᑦ ᐊᐅᓚᑦᑎᔨᓄᑦ ᐊᑐᕐᓂᖃᑦᑎᐊᖅᑐᑎᑦ ᒪᑭᒪᑎᑦᑎᓂᕐᒧᑦ − ᐅᕝᕙᓘᓐᓃᑦ ᐱᐅᓯᑎᑦᑎᒋᐊᓂᕐᒥᑦ − ᐃᓂᖏᓐᓂ ᖃᓄᐃᓐᓂᖏᓐᓂᑦ ᐃᓗᐃᑦ ᐃᓗᐃᓂ, ᐱᐅᖅᓱᐊᓯᓐᓈᖅᑐᑎᑦ ᐆᒻᒪᖅᑯᑎᓂᑦ ᐊᒻᒪ ᐊᐅᓚᓂᖏᓐᓄᑦ ᐊᑭᖏᓐᓂᑦ ᖃᒥᑦᑕᐅᓪᓗᑎᑦ ᓱᓇᒃᑯᑖᑦ ᐊᑐᖅᑕᐅᔭᕆᐊᖃᖅᑎᓐᓇᒋᑦ ᐊᑐᖅᑕᐅᒋᐊᓖᑦ.

ᐃᓪᓗᕗᑦ ᐱᑐᖃᕈᖅᐸᓪᓕᐊᑎᓪᓗᒋᑦ, ᒫᓐᓇᐅᔪᒥᑦ ᓯᒥᔅᓯᒪᔪᑦ ᑭᓪᓕᖏᓐᓂ ᒪᑐᐃᑦ ᐊᒻᒪ ᐃᒐᓛᑦ ᓄᖑᑎᖁᓐᓇᖅᑐᑦ ᐊᒻᒪ ᓱᕋᓪᓗᑎᑦ ᓯᓚᒧᑦ, ᐃᓗᐊᓃᕆᒃᑲᓂᖅᑐᓂᑦ ᐃᒻᓚᒦᖔᖅᑐᓂ ᐃᓪᓗᓄᑦ, ᐊᒻᒪ ᐆᓇᕐᓂᖓ ᔭᒐᑕᐅᓂᐊᖅᑐᓂ ᓯᓚᒦᖔᖅᑐᒥᑦ. ᑖᓐᓇ ᖁᕝᕙᕆᐊᖅᑎᑦᑎᔪᖅ ᐆᒻᒪᖅᑯᑎᓄᑦ ᐱᔭᐅᔭᕆᐊᓖᑦ ᓈᒻᒪᑦᑐᒥᑦ ᐆᓇᖅᓯᑎᓪᓗᒋᑦ ᐃᓂᒋᔭᕗᑦ, ᐱᓗᐊᖅᑐᒥᑦ ᓂᓪᓕᓇᖅᑎᓪᓗᒍ ᐅᑭᐅᒃᑯᑦ ᑕᑦᑭᖏᓐᓂ. ᓴᓇᔭᐅᓂᖏᑦ ᓯᒥᑦᑐᖅᓯᒪᔪᑦ ᐊᒻᒪ ᐋᖅᑭᔅᓯᒪᔪᑦ ᑭᓪᓕᖏᓐᓂ ᒪᑐᐃᑦ ᐊᒻᒪ ᐃᒐᓛᑦ ᐃᑲᔪᖅᑐᑦ ᐊᑦᑎᓪᓕᒋᐊᖅᑐᒋᑦ ᐅᖅᑰᓴᓂᕐᒧᑦ ᐱᑕᖃᕆᐊᖃᖅᑎᑕᐅᔪᑦ ᐊᒻᒪ ᐆᒻᒪᖅᑯᑎᓂᑦ ᐊᑐᕐᓂᖓ, ᐊᒻᒪ ᐃᑲᔪᖅᑐᓂ ᐃᓪᓘᑉ ᐃᓗᐊᓂ ᐆᓇᕐᓂᖓ ᐃᓗᐊᓃᖏᓐᓇᖅᑐᓂ ᐊᔾᔨᒌᓕᓐᓂᑦ.

ᖃᐅᒪᖃᓂᕐᒧᑦ ᐊᑐᖅᑕᐅᔪᑦ ᐆᒻᒪᖅᑯᑎᑐᖃᑦᑕᖅᑐᑦ ᐱᒋᐊᖅᑐᓂ 20% ᑎᑭᑦᑐᒍ 50% ᐃᓪᓗᓄᑦ ᐆᒻᒪᖅᑯᑎᖏᓐᓄᑦ, ᑕᐃᒪᓐᓂᖓᓄᑦ ᓇᓂᓯᓂᖅ ᖁᕝᕙᕆᐊᕐᓗᒍ ᐊᑐᑦᑎᐊᓂᖅᓴᐅᓂᖏᓐᓄᑦ ᐃᒪᐃᑦᑎᑦᑎᒍᓐᓇᖅᑐᖅ ᐃᓪᓘᒐᔪᑦᑐᒥᑦ, ᖁᕝᕙᓯᑦᑐᒥᑦ−ᐊᐅᓚᓂᖃᑦᑎᐊᖅᑐᖅ. ᖃᐅᒪᖃᓂᕐᒧᑦ ᓴᓇᒋᐊᖅᑕᐅᓂᖏᑦ ᐊᑯᓂᐅᔪᒧᑦ, ᐆᒻᒪᖅᑯᑎᓂᑦ ᐊᑐᑦᑎᐊᕐᓂᖃᖅᑐᑦ ᖁᕝᕙᕆᐊᖅᓯᒪᔪᑦ ᐱᔾᔪᑎᒋᓪᓗᒋᑦ LED ᖃᐅᒪᖃᓂᕐᒧᑦ ᐊᒻᒪ ᓯᓚᑐᔪᒥᑦ ᐃᓪᓗᖃᓂᕐᒧᑦ ᐊᐅᓚᑕᐅᓂᖏᓐᓄᑦ. ᐅᓪᓗᒥᒨᖓᓕᖅᑎᑕᕗᑦ ᖃᐅᒻᒪᖅᑯᑎᓄᑦ ᐋᖅᑭᔅᓯᒪᔪᑦ ᐊᒻᒪ ᐊᐅᓚᑕᐅᓂᖏᓐᓄᑦ ᐊᑕᖏᑦᑎᐊᖅᑐᒋᑦ ᒐᕙᒪᒃᑯᑦ ᐃᓪᓗᖏᓐᓂ, ᑐᕌᒐᖃᖅᑐᑎᑦ ᐆᒥᖓ: • ᐊᑎᓪᓕᒋᐊᕐᓗᒋᑦ ᐆᒻᒪᖅᑯᑏᑦ ᐱᔭᐅᔪᒪᔪᑦ ᐊᒻᒪ ᐆᒻᒪᖅᑯᑎᑐᖅᑕᐅᔪᑦ, ᑕᐃᒪᐃᓐᓂᖓᓄᑦ ᐱᐅᖅᓱᐊᖅᑐᑦ ᐆᒻᒪᖅᑯᑎᓄᑦ ᐊᑭᖏᓐᓂᑦ ᐊᒻᒪ ᐊᑎᓪᓕᒋᐊᖅᑐᑎᑦ ᐳᔪᕐᓗᐃᑦ ᓯᓚᒨᖅᑕᐅᔪᑦ ᐊᑦᑐᐊᓂᓖᑦ ᐆᒻᒪᖅᑯᑎᓕᐅᓂᕐᒧᑦ ᓄᓇᓕᒻᒥᑦ ᐆᒻᒪᖅᑯᑎᓕᐅᕐᕕᓐᓂᑦ; • ᐊᑐᒐᖃᓕᕐᑎᓪᓗᒋᑦ ᖃᐅᒪᖅᑯᑎᓄᑦ ᓴᓇᓯᒪᔪᑦ ᐱᒡᒐᓇᖏᑎᓪᓗᒋᑦ ᓴᓇᔭᐅᓂᖏᓐᓄᑦ ᐊᒻᒪ ᖃᐅᒪᖃᑦᑎᐊᑎᑦᑎᓂᖅᓴᐅᓗᑎ ᐃᓂᓕᒫᖑᔪᓂᑦ; • ᐱᐅᓯᑎᒋᐊᕐᓗᒍ ᖃᐅᒪᖃᓂᕐᒧᑦ ᐊᑐᑦᑎᐊᓂᕐᒥᑦ ᐊᒻᒪ ᐊᐅᓚᑕᐅᓂᖏᓐᓄᑦ, ᓇᔪᖅᑕᐅᓕᕐᓂᖓᓄᑦ ᐃᑭᑦᑕᐅᑎᒋᔭᖅᑐᓄᑦ ᖃᒥᑦᑕᐅᑎᒋᔭᖅᑐᓄᑦ ᐊᒻᒪ ᖃᒥᒋᐊᕈᑏᑦ ᐃᓚᔭᐅᔪᑦ ᓇᓗᓇᐃᖅᑕᐅᓯᒪᔪᓂᑦ ᐊᑦᑎᓪᓕᒋᐊᖅᑎᑎᒃᑲᓂᕐᓗᑎ ᐆᒻᒪᖅᑯᑎᓂᑦ ᐊᑐᓂᕐᒧᑦ ᐊᒻᒪ ᐱᐳᓯᑎᒋᐊᕐᓗᒍ ᖃᐅᒪᖃᓂᕐᒧᑦ ᐊᑐᖅᑕᐅᓂᖓ.

ᐊᐅᓚᐅᑎᓅᖓᔪᑦ ᐊᑐᖅᑕᐅᔪᑦ ᐃᓪᓗᒨᑦ ᐆᓇᕐᓂᖃᖅᑎᑦᑎᔪᑦ, ᐊᒻᒪ ᐊᓂᕐᓂᖃᖅᑎᑦᑎᔪᑦ, ᐊᒻᒪ ᐃᒥᕐᒧᑦ ᐆᓇᖅᑐᓕᐅᕈᑏᑦᐊᐅᓚᓂᖏᑦ ᐃᑲᔪᐃᓂᖃᖅᑐᑦ ᐱᐅᓯᑎᒋᐊᕈᑎᓂᑦ, ᐆᒻᒪᖅᑯᑎᓂᑦ ᐊᑐᑦᑎᐊᓂᖅᓴᐃᑦ ᐊᔾᔨᐸᓗᖏᑦ ᐊᑯᓂᐅᓂᕆᓂᐊᖅᓯᒪᔭᖏᓐᓄᑦ ᐊᑐᕈᓐᓇᖅᑕᐅᓂᖏᓐᓄᑦ ᐊᑯᓂᐅᓂᖃᖅᑐᑎᑦ. ᑖᒃᑯᐊ ᐱᓕᕆᐊᕆᔭᕗᑦ ᐱᐅᓯᑎᒋᐊᕈᑏᑦ ᐱᑐᖃᕐᓄᑦ, ᐊᐅᓚᓂᖃᑲᒻᒪᑦᑐᑦ ᐊᓄᕌᕈᑏᑦ, ᒥᓪᓗᐊᕈᑏᑦ, ᐆᓇᖅᓯᑦᑏᑦ, ᐊᒻᒪ ᐊᓯᖏᑦ ᑲᑉᐳᑎᒋᐊᖃᒐᔪᑦᑐᑦ ᒐᕙᒪᒃᑯᑦ ᐃᓪᓗᖏᓐᓂᑦ ᐱᐅᓯᑎᒋᐊᕆᐊᖃᖅᑐᑦ ᐱᔨᑦᑎᖅᑕᖏᑦ. ᐊᒥᓲᓂᖅᓴᐅᔪᓂᑦ, ᑖᒃᑯᐊ ᐱᐅᓯᑎᒋᐊᕈᑏᑦ ᐃᓪᓗᑎᓐᓂᑦ ᑎᑭᑦᑎᒍᓐᓇᑎᑦᑎᔪᑦ ᐊᑦᑎᓛᖓᓂ ᐊᐅᓚᓂᖏᓐᓄᑦ ᖃᓄᐃᓕᕆᔭᖏᓐᓂᑦ ᐆᒻᒪᖅᑯᑎᓄᑦ ᐱᔭᐅᔪᒪᔪᓄᑦ ᒪᑭᒪᑎᑦᑎᓪᓗᑎ, ᐅᕝᕙᓘᓐᓃᑦ ᐱᐳᓯᑎᒋᐊᖅᑎᑦᑎᓗᑎ, ᐃᓪᓘᑉ ᐃᓗᐊᓂ ᐊᕙᖏᑦ ᖃᓄᐃᓐᓂᕆᔭᖏᓐᓂᑦ. ᐊᓯᐊᒍᑦ ᐅᖃᕐᓗᒍ, ᐱᓇᓱᐊᖅᑐᒍᑦ ᐊᔾᔨᖓᓂᑦ, ᐅᕝᕙᓘᓐᓃᑦ ᐊᖏᓂᖅᓴᒥᑦ, ᐃᓪᓗᓂᑦ ᐊᐅᓚᑕᐅᑎᓅᖓᔪᑦ ᐊᑐᖅᑕᐅᔪᓂᑦ, ᑭᓯᐊᓂ ᐆᒻᒪᖅᑯᑎᑐᖏᓐᓂᖅᓴᐃᑦ!

ᓄᓇᒦᖔᖅᑐᑦ ᓯᕿᓂᕐᒧᑦ ᐆᒻᒪᖅᑯᑏᑦ ᐊᑐᖅᑕᐅᔪᑦ ᐃᑲᔪᖅᑐᑦ ᐃᓪᓗᒧᑦ ᐱᔭᕆᐊᓕᖏᓐᓂᑦ ᐅᖅᑰᓴᕐᕕᒋᓪᓗᐊᑕᕆᓗᓂᐅ ᐊᒻᒪ ᐅᐊᔭᓄᑦ ᐊᑐᖅᑕᐅᔪᑦ. ᑖᒃᑯᐊ ᐊᑐᖅᑕᐅᔪᑦ ᐆᒻᒪᖅᑯᑎᓕᐅᖅᑐᑦ ᐅᕝᕙᓘᓐᓃᑦ ᐆᓇᖅᑐᓕᐅᖅᑐᑦ ᐊᑐᖅᑐᑎᑦ ᓯᕿᓂᕐᒥᑦ ᐆᒻᒪᖅᑯᑎᓕᐅᖅᑐᓂᑦ ᐋᖅᑭᑦᑕᐅᓯᒪᔪᑦ ᖁᓕᖏᓐᓂᑦ ᐊᒻᒪ ᐊᕙᓗᖏᓐᓂᑦ ᐃᓪᓗᐃᑦ. ᐱᔪᓐᓇᑎᑦᑎᔪᑦ ᐊᑐᓂ ᐊᒻᒪ ᐃᓪᓗᓕᒫᓂᑦ ᐃᑲᔪᕐᓗᑎ ᑎᑭᑦᑎᓗᑎ ᐃᓚᖏᓐᓄᑦ ᐆᒻᒪᖅᑯᑎᓄᑦ ᐱᔭᐅᔪᒪᔪᓂᑦ ᓇᔪᖅᑕᐅᔪᒥᑦ. ᐃᑲᔫᑎᒋᔭᖓ ᐃᓪᓗᒧᑦ ᐊᕙᑎᒧᑦ ᐱᐅᔪᖅ, ᑖᒃᑯᐊ ᐊᑐᖅᑕᐅᔪᑦ ᐊᑦᑎᑦᑑᑎᑦᑎᔪᑦ ᐳᔪᕐᓗᓂᑦ ᐲᔭᐃᔪᑦ ᐱᔭᐅᔪᒪᔪᓂᑦ ᐊᑐᖅᑕᐅᔪᓂᑦ ᐅᖅᓱᐊᓗᑦᑐᖅᑐᓂᑦ.